Samanyatha, yah dekha gaya hai ki sevanivruti ke baad vyakti apne vyaktigat abhilekh ke upar dhyaan nahi deta hai tatha apne civil jeevan mein dheere dheere bhul jata hai. Jabki apne vyaktigat pensionary record ke bare mein jankaari unka anivaary kartavya hai tatha ise sarvoch sthan apne aur apne ashriton ke liye dena chahiye. Ek pensionor yaa unke ashrit apni pension sambandhit jaankari sucharu roop se nahi rakhne ke karan pension sambandhi laabh se banchit rah jate hain isliye unse nimn baton ki aashayen ki jaati hai :-

(a)     Apke sthaniy/dak pate ke badalne par iski soochana apne PDA aur Abhilekh Karyalaya ko den.

(b)     Vaarshik jaanch ke lie PDA aapko varsh mein ek baar bulaati hai jiska paalan nahi karne par pension ruk sakati hai.

(c)     Agar aap Rajya/Kendra Sarkaar ya public sector mein punar rojgaar kar rahe hain to isaki apne PDA aur Abhiliekh Karyalaya me puri jaankari de jisse pension par Dainik Bhatta tay kiya jaa sake. Agar aap punar rojgaar mein nahi hai to iska ghoshna patra varsh mein ek baar PDA ko avashy de.

(d)    Agar aap ek se jyaada pension le rahe ho to uska poora vivaran apane Abhilekh Karyalay/ Seva Mukhyalaya aur PDA ko donon pension/bhatta ko sudharne ke liye dena hoga. Agar aap apna pension khaata kisi doosare PDA/bank mein badalna chahate ho to aap iska aavedan apne vartman PDA se kar sakte hai. PCDA (P) Allahabad is vishay mein koi karyawahi nahi karega.

(e)    Agar pensioner ki shadi sevanivruti ke baad mein hoti hai ya koi bachche ka janam ya mirtyu ya patni ki mirtyu hoti hai to iski suchana Abhilekh Karyalaya mein Sheet Roll ya seva pustika mein darj karne ke liye bheje.

(f)      Agar Pariwarik pension prapt hetu koi ladai hai to is ka hal apane Abhilekh Karyalaya aur ARO ke saath kare jiske liye sahayata Zilla Sainik Board se liya ja sakta hai.

(g)     Medical ground par sevanivrit hone aur Apangata Pension reject hone par Seva Mukhyalaya ko 6 mah ke andar Abhilekh Karyalaya dwara appeal kar sakte hain.

(h)     Pensioner ko Abhilekh Karyalaya dwara nirdharit tithi par RSMB karwana chahiye. RSMB lambe samay tak nahi karane se uska vivran non conviction tatha non employment praman patra ke saath apne Abhilekh Karyalaya mein bheje jiske dwara pensioner ko najdeeki Sainik Hospital mein naye RSMB ke liye bheja jata hai.

(j)     Pension ki bhugtaan se sambadhit kisi bhi samasya ke nivaran ke lie apne PDA ko apne TS/HO/PS/PPO No tatha bank khata sankhya ke vivran ke saath bheje. Agar aapki samasya PDA se hal nahi hoti hai to is samasya ko PCDA (P) Allahabad ko poore vivaran ke saath bheje. Aaap is ke liye www.pcdapension.nic[dot]in website refer kar sakte hain tatha e-mail ke dwara bhi bhej sakate hain.

(k)    DPLC (Raksha Pension Liaison Cell) c/o HQ Poorv UP & MP Sub Area Allahabad (UP) Sainik/Bhootpurva Sainik ke pension sambandhit koi bhi samasya ko suljhane ka kaam karta hai. Agar pension sambadhit samasya aapke PDA/bank dwara nahi hal hoti hai to aap DPLC ko dak dwara shikayat bhej sakte hain ya Phone No - 0532-229-6219/2423486 par sampark kar sakte hain.